راولپنڈی: (ویب ڈیسک) پاک فوج کے سربراہ جنرل قمر جاوید باجوہ کے زیر صدارت کور کمانڈرز کانفرنس میں عسکری قیادت نے اس عزم کا اعادہ کیا ہے کہ پاک فوج مادر وطن کے بھرپور دفاع کے لیے ہر وقت تیار ہے۔
آئی ایس پی آر کے مطابق آرمی چیف جنرل قمر جاوید باجوہ کے زیر صدارت جی ایچ کیو میں کور کمانڈرز کانفرنس ہوئی جس میں مقبوضہ کشمیر، قومی سلامتی اور جیو سٹریٹیجک صورتحال کا جائزہ لیا گیا۔
کور کمانڈرز کانفرنس میں عسکری قیادت نے اس عزم کا اعادہ کیا کہ پاک فوج مادر وطن کے بھرپور دفاع کے لیے ہمہ وقت تیار ہے۔ پاکستان کا دفاع ہر حال میں یقینی بنائیں گے۔ پاک فوج وطن کی سالمیت، عزت اور وقار کے تحفظ کے لیے پرعزم ہے۔
کور کمانڈرز کانفرنس نے کہا کہ کسی بھی بھارتی جارحیت کا بھرپور جواب دیا جائے گا ،کشمیر پاکستان کی شہ رگ ہے۔ کشمیریوں کے حق خود ارادیت پر کوئی سمجھوتہ نہیں ہوگا۔ کانفرنس میں یو این جنرل اسمبلی میں مقبوضہ کشمیر میں بھارتی انسانی حقوق کی خلاف ورزیوں کو بے نقاب کرنے کو سراہا گیا۔