یجنگ: (ویب ڈیسک) وزیر اعظم عمران خان چین پہنچ گئے،ایئرپورٹ پر شاندار استقبال کے بعد بیجنگ پہنچنے پر وزیراعظم کو گارڈآف آنر پیش کیا گیا ۔
اپنے دو روزہ سرکاری دورے کے دوران وزیر اعظم چین کے صدر شی جن پنگ اور وزیراعظم لی کی کیانگ سے ملاقاتیں کریں گے۔ وزیراعظم کے ہمراہ وزیر خارجہ شاہ محمود قریشی، وزیر ریلویز شیخ رشید، وزیر منصوبہ بندی، ترقی و اصلاحات خسرو بختیار، مشیر تجارت عبدالرزاق داؤد، معاون خصوصی پٹرولیم ندیم بابر، چیئرمین سرمایہ کاری بورڈ اور سینئر حکام بھی ہیں، دونوں ملکوں کے درمیان متعدد معاہدوں اور مفاہمت کی یادداشتوں پر دستخط ہوں گے۔
وزیراعظم جنوبی ایشیا میں امن و سلامتی پر بھی خیالات کا اظہار کریں گے اور چینی قیادت کو سی پیک منصوبوں پر عملدرآمد سے آگاہ کریں گے جبکہ میزبان ملک کے کاروباری اور کارپوریٹ سیکٹر کے نمائندوں سے ملاقاتیں بھی کریں گے۔ وزیراعظم بیجنگ انٹرنیشنل ہارٹی کلچر ایکسپو کی اختتامی تقریب میں مہمان خصوصی ہوں گے۔ عمران خان چین کے صدر اور وزیراعظم کی طرف سے اپنے اعزاز میں دی گئی الگ الگ ضیافتوں میں شرکت کریں گے۔